كل سنه وانتم طيبين بقلم دكتور شريف حافظ

نحب إننا نهني كل مسلمي مصر بعيد الأضحى. وندعى ربنا أنه يعيد علينا الأيام دي بالخير على بلدنا

بس برضه، نحب أننا نستغل اللحظة دي، علشان نقول كلمتين ملخصين وبسرعة بس نتمنى أنهم يوصلوا القلب

الجروب ده، إتعمل بالأساس علشان حب مصر. لا كان فيه نيه للدخول في معركة مع الجزاير ولا غير الجزاير. إضطرينا ندخل المعركة دي، لسبب واحد بس: هو كرامة مصر ولأننا بنحب مصر وما نرضاش أي إنسان يعتدي على كرامة المصريين، أياً كان مكانهم أو دينهم أو طبقتهم الإجتماعية أو فكرهم السياسي! يعني أحنا ما دخلناش الموضوع ده، إلا لأننا بنحب مصر. والجروب ككل أتعمل علشان حبنا لمصر وأن المصري يبقى متساوي مع المصري أياً كانت الفروق بين المصريين. يعني طالما تحمل الجمسية المصرية، ما يهمناش أنت مين بعد كده! لا يهمني أنت عندك كام في البنك، ولا يهمني أنت مسلم ولا مسيحي ولا بهائي، ولا يهمني أنت ساداتي ولا يساري ولا ناصري ولا شيوعي .. بس ما فيش هنا أعلى من كلمة مصر! يعني لا يهمني عروبة ولا يهمني العالم كله، مع الإحترام لكل دول العالم ومواطني تلك الدول، لأننا في النهاية دولة سياحية، لازم نحترم الدنيا بحالها لأن لينا مصالح أن نزود زوار مصر ويحبونا علشان يرجعوا تاني يشربوا من مية نيلنا المعطاء

الجروب ده معمول لحب مصر ومش معمول لكره حد تاني! الجروب ده معمول علشان أخد حق المصري من أي حد يعتدي عليه وبالحق! الجروب ده معمول علشان ننسى بقى حكاية التفرقة بين المصريين على أي أساس، ونبتدي نتوحد لمصلحة مصر لأن توحدنا ده، هو اللي حيخلينا نبقى أقويا! الجروب ده معمول علشان الحب، ومش الكره

أنا وأنتم ضد اللي عمله الجزائريين ومش حنتنازل عن حق مصر في القصة دي! بس خلاص.. أحنا عملنا اللي علينا والقصة معروضة على الجهات الدولية وبتتولاها الدولة دلوقتي، وأحنا منتظرين! بس في النهاية، كرهنا للجزاير مش هو اللي حيبني مصر! حبنا لمصر هو اللي حيبنيها ويعرف مليون جزاير، أحنا مين لما بنحب نشتغل سوى! يعني ناخد حقنا من الجزاير، بس نحب مصر أكثر ما بنكره الجزاير

حتقولي إزاي؟ حقولك نفكر إزاي نخلي بلدنا أحسن في الحاجات اللي نقدر عليها! يعني على أد ما نقدر ما نرميش حاجة في الشارع، علشان نحافظ على نظافة الشارع. وممكن نمنع الناس التانية ترمي حاجة في الشارع من غير ما نجرح مشاعرهم بطريقة مش حلوة. يعني مثلاً: أنا شباب وشابات الفيس بوك من أهالي مصر المحروسة، من كام يوم كنت بعمل رياضة المشي اليومية ولقيت ولد يجيله بتاع 10 سنين رمى كيس شيبس في الشارع، وكان شايفني، رحت رايح لكيس الشيبس، وواخده من الأرض ورايح ناحية الزبالة علشان أرميه.. جري ورايا، وقالي: خلاص حضرتك: أنا اللي حرميه!!!

خدتوا بالكم؟ لا قلتلوا أنت وحش ولا بتاع.. بالمثل كده قدامه، حس أنه غلطان.. وبس! دي بلدنا ولازم نحافظ على نظافتها.. وفيه حاجات تانية كثير.. وطول ما أنت بتحبها، طول ما ختقدر أكثر أنك تحافظ عليها.. يعني مثلا نبطل نشتم بعض ونتخانق مع بعض ونحاول نبقى ناس راقية شوية.. إختلفت مع حد.. حاول نفهم وجهة نظره براحة.. ما هو لو كل 2 مصريين إتخانقوا، حتبقى البلد كلها خناقات.. كده ما ينفعش لجل مصلحة بلدنا

أه! أنا طولت عليكم وكنت مفروض أقصر زي ما قلت فوق.. بس حختم بأني أقولكم على الجروب اللي شغال النهاردة في أنه يعمل أكبر "علم" على مستوى العالم، لمصر، وهو العلم اللي حيدخل موسوعة الأرقام القياسية، جينيس. يعني اللي عايز يساهم مجهوده أو ولو بجنيه أو ولو بأنه يروح في الآخر الحفلة اللي حيترفع فيها العلم ده ويحضر ناس من كل أنحاء العالم، يشترك في الجروب ده اللي عملاه، زميلتنا في الجروب هنا: الأستاذة آسر ياسر، واللي شاركنا فيه مع كل المصريين والمصريات من محبي هذا البلد وهذا الشعب العظيم

حملة شارك بمتر قماش لتصميم أكبر علم فى العالم تحت شعار مصر هتفضل غالية علية
http://www.facebook.com/home.php?#/group.php?gid=214492725324

ملاحظة أخيرة: بكرة للي يذبح أضحية: يا ريت تحسنوا الذبح: الرحمة بالحيوان يا شباب! وتذكروا: من لا يرحم، لا يرحم! الرحمة لكل خلق الله
كل سنة وكل مصري بخير .. كل سنة ومصر بيكم دايما بخير
"أيد على أيد، حنرجع مصر من جديد"
فريق عمل حب مصر هو الحل
مصر أولاً دائماً وأبداً